Alegiako Merkatari Taldeak gabonetako kanpaina berezi bat jarriko du abian abenduaren 1ean, osteguna. Herrian kontsumitzen duten erabiltzaileen fideltasuna eskertzeko helburuarekin, saski baten zozketa egingo da datorren abenduaren 22an. Alegiako 31 saltokitan banatuko dira zozketan parte hartzeko txartelak eta hilaren 22ko gabonetako loteriako lehen saria irabazten duen zenbakiaren azken lau zifrekin bat datorren txartela izango da irabazlea. Txartelak banatzen abenduaren 1ean, osteguna, hasiko dira eta merkatariek beraiek banatuko dituzte txartelak.

Saskia, Alegiako Merkatari Taldea osatzen duten kideek eskainitako produktuekin osatuko da eta denetarik izango da bertan. Jan-edanetik hasi eta bestelako zerbitzu ugariz gozatzeko aukera izango du saskia egokitzen zaionak. Datozen egunetan Maitere janaridendako erakusleihoan jarriko da ikusgai saskia. Gauzak horrela, Alegiako Merkatarien Taldeak dei egiten die herritarrei Alegiako saltokietan konstumitu dezaten. Izan ere, kanpainaren leloak dioen moduan “Zaku bete opari gabonetan Alegian”.