Alegiako Udalak abenduaren 23ko osoko bilkuran onartu zuen 2025ekitaldirako aurrekontua. Bi udal taldeek aho batez eman zieten onespena hasi berri den urterako diru kontuei eta orotara 4.305.712,81€ko aurrekontua izango da. Kopuru horren ia %45a, 1.937.500€ hain zuzen ere, inbertsioetara bideratuko dira eta hauek izango dira inbertsio lerro nagusiak:

-Osasun zentroa eta eraikin horrek bere baitan biltzen dituen azpiegiturak: 1.811.000 euro bideratuko dira osasun zentroa kokatzen den eraikinaren eraberritze lanetara. Osasun zentroaz gain, Jubilatuen elkartearen egoitza ere bertan dago eta berau ere berrituko da.
-Kultur etxean erabilera anitzeko gela bat: 46.000 euroko inbertsioa izango da eta espazio horretan gauza ezberdinak egin ahal izateko gune bat izango da.
-Alegiako Alde Zaharra Birgaitzeko Plan Berezia berritzea: 40.000 euroko diru kopurua bideratuko da lanketa horretarako.
-Lur mugen digitalizazioa: 30.000 euro bideratuko dira bertara.
-Bulego ekipamendua: 10.500€ zuzenduko dira beharrezkoa den materiala erosteko.

2025eko Udal aurrekontuaren dokumentua dagokion izapide ezberdinak igarotzen ari da eta behin betiko onarpena jaso eta argitaratzen denean, Udal webgunean izango duzue eskuragarri.