COVID-19aren krisialdiak eragindako itxialdi garaiak modu nabarmenean azaleratu du herrietan zerbitzuak izateak duen garrantzia. Behar genuen guztia herrian bertan erosi beharrean aurkitu gara eta ezinbestekoak diren sektoreetako saltokiek erakutsi duten prestutasunak frogatu du Alegia bizia duen herria dela.

Alarma egoera indarrean jarri zenean bertan hasi ziren merkatariak baldintza berrietara egokitzen. Zerbitzua eskaintzen jarraitzeko aukera izan dutenek segurtasun eta higiene neurriak bermatuz lan egiten ikasi behar izan dute, kontsumitzaileek ere arau eta baldintza berrietara egokitu behar izan duten modura.

Ezinbestekotzat jo ez diren sektoreetako jarduerek ateak itxita egon behar izan dute edo diraute oraindik ere. Baina ez dira geldirik egon. Egoera berriak eskatzen dituen baldintzetara egokitzen aritu dira, berriz ere zerbitzua eskaintzeko modua izaten dutenerako guztia prest izateko helburuarekin.

Izan ere, Alegiako merkatariek herria bizirik mantendu dute eta horretan jarraitzen dute ezohiko egoera honetan. Orain herritarroi dagokigu herria bizirik mantendu dutenei bizia ematea. Beharra izan dugunen hor egon dira eta orain eskaini diguten zerbitzu hori eskertzeko aukera dugu.

‘Egin bizia herri bizian’ kanpainak herriko merkatariek osatzen duten altxorra nabarmentzearekin batera, berau osatzen duten elementuak herritarrei hurbiltzea du helburu. Gauzak horrela, egunotan saltoki inguruetan merkatariei eskertza adierazten dieten kartelekin batera, hurrengo urrats batean bezeroek saltoki horietan jaso beharreko zerbitzua segurtasun osoz jaso ahal izateko bete beharreko neurrien berri emango da eta hirugarren urrats batean, Udalak herriko zerbitzuen gida osatu bat jarriko du herritarren eskura.

Gogoan izan, gure esku dago orain bizia eman digutenei bizia ematea. Herri bizi batean bizia egiten badugu, denok aterako gara irabazten.