Iñaki Artolak eta Ander Imazek binakako pilota txapelketako bosgarren puntua lortu zuten larunbatean. Olaizolaren eta Urrutikoetxearen aurka 22 eta 9 irabazi zuten goitik behera nagusi izan ziren partida batean. Hasieratik tartea zabaldu zuten eta azkenerako eroso aritu ziren. Ostiralean Bengoetxearen ordez txapelketan sartu den Victorren eta Mariezkurrenaren aurka jokatuko dute Hendaian. Une honetan, Artola eta Imaz sailkapeneko bigarrenak dira, beste hiru bikoterekin berdinduta. Aurkariak berriz azken postuan daude garaipen bakarrarekin.

Intxurre bihar eta etzi

Intxurreko pilotariek bihar eta etzi jokatuko dituzte partidak Elorri pilotalekuan. Bihar, osteguna, Udaberri txapelketako gizonezkoen kadeteen lehen mailako partida bat jokatuko da 20:00etan Intxurre eta Zazpi Iturriren artean. Ostiraleko jaialdia 18:30ean hasiko da eta gomazko paletako partida bat eta eskuz binakako bi izango ditu. Paletan, emakumezko jubenilen Intxurreko bi bikote elkarren aurka ariko dira lehen partidan. Ondoren, gizonezkoen jubenil eta nagusien mailetan, Intxurreko eta Tolosako bikoteak neurtuko dira eskuz binaka.