Azken urteetan egin den moduan, Balkoi eta Lorategi Dotoreenaren lehiaketa egingo da aurten ere festen bueltan. Festa batzordeak balkoiak eta leihoak zaintzeko ohitura berreskuratzeko helburuarekin egiten du lehiaketa hau eta horrek herriaren itxurari eta ingurumenari eragiten dion mesedea balioan jartzea da beste helburua. Epaimahaiko kideak herriko kaleetan ibiliko dira ekainaren 17tik 23ra eta modu horretan herriko leiho eta balkoi guztiak aztertuko dituzte. Hainbat irizpide izango dituzte kontuan balorazioak egiterakoan: kolorea, landareen aniztasuna, estetika, konbinaketa eta txukuntasuna. Ohi bezala, epaimahaiko kideak gai horretan adituak diren pertsonak izango dira eta beraien erabakiaren berri Alegiako jaietan emango dute. Uztailaren 14an, igandea, emango da emaitzen berri eta sari banaketa ere bertan egingo da. Maila bakoitzeko irabazleek 150 euroko opari txartela jasoko dute herriko saltokietan kontsumitzeko. Sarituek egunean bertan jaso beharko dute saria.