Mundua hankaz gora jarri izan ez balitz, egun hauetan Alegiako jaiak ospatuko genituen. Bada, aurtengo egoerak ez du jaiak normaltasunez ospatzerik ahalbidetu eta horren ordez, Festa batzordeak jaiak etxean ospatzeko ekintza batzuk prestatu ditu biharko, uztailak 16. Goizean balkoi dotoreenaren lehiaketako irabazleen berri emango da Udaleko webgunearen eta sare sozialetako profilen bidez. 16:00etan Sutarri dantza taldeak prestatu duen bideo bat eskainiko Udaleko webgunean eta Facebook zein Twitterreko profiletan. Urtero egiten du jendaurreko emanaldia dantza taldeak eta aurten beste modu batera egingo den arren, herritarrek emanaldiaz gozatzeko aukera izango dute. 21:00etan balkoietan txintxarriak joz agurtuko da eguna. Udaletik herritarrei arduraz jokatzeko deia egiten zaie. Jende pilaketak ekidin behar dira eta maskarilaren erabilera gomendatzen da, segurtasun distantzia mantentzearekin batera.