Intxurreko futbol taldeek bi puntu urratu dituzte asteburuan jokaturiko bost partidetan. Jubenilen lehen mailan golik gabeko berdinketa izan zen Idiazabalen eta Intxurreren artean. Sailkapeneko laugarren postuan dira orain alegiarrak hamar punturekin eta Beasain liderraren aurkako partida izango dute etxean, igandean 12:00etan. Kadete mailako mutilak izan ziren bigarren berdinketa lortu zutenak. Beasainen aurka hiruna berdindu zuten etxean eta puntu hori batuta bederatzi dituzte sailkapeneko laugarren postuan. Punturik gabe azkena dagoen Idiazabalen bisita izango dute larunbatean 11:00etan.

Gainontzeko taldeek galdu egin zuten. Gorengoen mailakoek 2 eta 4 Zumaiakoren aurka. Garaipenik lortu gabe jarraitzen dute sailkapeneko azken postuan eta hirugarren dagoen Bergararen zelaian jokatuko dute larunbatean 15:45ean. Kadete neskek hiru eta bi galdu zuten Hernanin. Zazpi puntu dituzte eta laugarren postuan jarraitzen dute, larunbatean 15:30ean beraien atzetik dagoen Oriokoren aurka etxean jokatu aurretik. Azkenik, Aralar Intxurreko infantilek 5 eta 0 galdu zuten Ordizian. Seigarrenak dira eta asteburuan atsedena izango dute.