Elorri Aldapa garaipenaren bidera itzuli zen larunbatean azken hiru partidak jarraian galdu ostean. Alegiarrek AZ Casa de la Rioja taldearen aurkako liga partida izan zuten iragan larunbatean Elorri pilotalekuan eta 72 eta 52 irabazi zuten. Hasieratik nagusi izan zen Elorri Aldapa. Lehen laurdena 19 eta 8 amaitu zen eta atsedenaldi luzera 39 eta 20 iritsi ziren. Eroso aritu ziren etxeko jokalariak eta markagailuko aldea mantentzera mugatu ziren azken bi laurdenetan. Elorrin bildu ziren zaleen babesik ez zitzaion falta izan taldeari eta horrek ere lagundu zuen hirugarren garaipen hori lortu ahal izateko.

Hurrengo partida sailkapeneko liderra den Goierri Modelos Ezguba taldearen aurkakoa izango du Elorri Aldapak azaroaren 20an, igandea, 18:00etan Urretxun. Bigarren mailako talderik indartsuenetako bat izango dute aurrean. Jokaturiko sei partidak irabazi dituzte goierritarrek eta horrenbestean, hezur gogorra izango dute aurkari Elorri Aldapakoek. Ahalik eta mailarik onena ematea eta aurkariari gauzak zail jartzea izango dute helburu, bigarren mailan urratsez urrats egonkortzen ari den taldeko jokalariek.