Duela egun batzuk jarri ziren abian Larraitz auzoko ekialdea eraberritzeko lanak. 2022ko azaroan egindako galdeketan, herritarrek aisialdi gune eta aparkalekuen inguruan oreka gehien eskaintzen zuen proposamenaren aldeko hautua egin zuten eta aipatu bezala, orain egun gutxi hasi dira lanak.

Lanerako beharrezkoa den materiala eta makinaria ekartzea izan zen lehen egitekoa eta ondoren ingurua egokitzeko lanak gauzatu dira. Esate baterako, errepidearen alboan hainbat aparkaleku egokitu dira, lanek irauten duten bitartean auzoan aparkatzeko eragozpenak izango direlako. Zentzu horretan, Udalak ulermena eskatu nahi die auzotarrei. Eremua eraberritzeko lan horiek hainbat eragozpen eta traba eragin ditzakete datozen hilabeteetan baina eraberritze prozesu orok dakartza berarekin horrelako albo kalteak. Hamaika hilabeteren buruan lanak amaituta izatea aurreikusten da.