Iñaki Artolak ez du Jokin Altunaren aurkako buruz buruko txapelketako finala jokatuko. Alegiarrak Rezustaren aurkako finalerdiko azken tantoetan min hartu zuen eskuin sorbaldaren atzealdeko gihar zabalean eta astebeteko atzerapena eman arren, ez du ekainaren 20rako iragarrita dagoen finalean aritzeko osatzeko denborarik izango. Artolak ez du zorte handirik izan lesioekin profesionaletan ari denetik. Bere ibilbideko partidarik garrantzitsuenaren atarian, lesio berri batek utziko du alegiarrak buruz buruko lehen mailako finaletik kanpo.

Ez dira une samurrak izango Artolarentzat baina azken egunetan herritarren babesa ere jaso du. Larunbat goizean Alegiak eta Oiartzunek Herriarteko partidak jokatu zituzten Elorri pilotalekuan eta bi taldeetako pilotariek Artolari animoak emateko pankarta bat atera zuten. Bertan zen Iñaki eta keinuarekiko esker ona adierazi zuen.

Arratsaldean berriz herritar talde baten ekimenez, Artolari babesa adierazteko argazkia atera zen plazan eta ondoren pankarta udaletxeko balkoian jarri zen. Lerro hauen bidez ere, Udalak animoak bidali nahi dizkio Artolari. Eutsi Iñaki!!

Herriartekoan ezinean

Aurrez aipatu bezala, Alegiak Gipuzkoako Herriarteko pilota txapelketako finalerdien joaneko partidak jokatu zituen larunbat goizean Elorri pilotalekuan. Oiartzun dute aurkari finalerako txartela jokoan duen kanporaketa horretan eta egiari zor, oiartzuarrek hanka eta erdi finalean dutela esan daiteke. Hiru partidak irabazi zizkieten alegiarrei eta ostiralean Oiartzunen jokatuko diren itzulerako partidetan ezusteko handia eman beharko lukete alegiarrek, kanporaketari buelta eman eta finalean sartzeko.

Intxurrekoen finala

Udaberri txapelketako finala izango dute Intxurreko gomazko paletan aritzen diren jubenil mailako emakumezko bi bikotek. Olano eta Agirre multzoko lehen postuan sailkatu ostean zuzenean sartu ziren finalean. Agirrek eta Iturriotzek berriz Zumaiaren aurkako finalerdia 30 eta 23 irabazi zuten eta horrela, Intxurreko bi bikoteak elkarren aurka ariko dira igandean 11:30ean Elorrin jokatuko den finalean.

Modalitate berean, Euskal Ligako partida izango dute Intxurrekoek Hernaniren aurka eta eskuz binaka, gizonezkoen nagusien mailan, Intxurrek Larraunen aurka jokatuko du Euskal Herriko Ligan.