Intxurreko gorengo mailako neskak eta kadete mutilak izango dira asteburuan Elorri zelaian jokatuko diren partidetako protagonistak. Gorengo mailako neskek Leintz Aloñaren aurkakoa izango dute igandean 16:00etan. Eibarren aurka 6 eta 1 galdu ostean, garaipenaren bidera itzuli nahiko dute Intxurrekoek. Kadete mutilek berriz, multzoko liderra den Realaren bisita izango dute larunbatean 11:45ean. Iragan astean Tolosan lortutako puntua ona bihurtzen ahaleginduko dira.

Bestelakoan, Aralar Intxurreko bi taldeek garaipen erosoekin ekin diote denboraldiari. Neskek zein mutilek erraz irabazi zituzten Euskaldunaren eta Urnietaren aurka. Larunbatean 9:00etan neskek Danenaren zelaian jokatuko dute eta mutilak Hernanin ariko dira igandean 10:00etan.

Erregional mutilek hiruna berdindu zuten Segura Goierriren aurka. Laugarrenak dira eta zortzigarren dagoen Urolaren zelaian jokatuko dute larunbatean 16:00etan. Jubenil mutilek Ordizian jokatuko dute egun eta ordu berean. Danenaren aurka 1 eta 2 galdu zuten azken partidan eta emaitza horri buelta ematen ahaleginduko dira. Azkenik, kadete neskek 4 eta 3 irabazi zuten Goierri Gorriren aurka. Lehen hiru puntuak batuta, emaitza bolada onari eusteko asmoz joango dira larunbatean 17:30ean Bergarara.