Intxurreko erregional eta infantil mailetako mutilen taldeen partidak jokatuko dira larunbatean Elorri futbol zelaian. Erregionalek bigarren itzuliko lehen partida izango dute sailkapeneko hirugarrena den Lazkaoren aurka 15:30ean. Ikasberriren aurka 4 eta 0 irabazi zuten alegiarrek eta laugarren postuan daude, bi puntu gutxiagorekin. Infantil mutilek sailkapeneko azkena den Ostadarren aurkakoa izango dute egun berean 11:00etan. Beasainen bana berdindu zuten eta laugarrenak dira hauek ere.

Bestelakoan, kadete mutilek 1 eta 0 irabazi zuten Amaikak Bat taldearen aurka. Bederatzigarrenak dira eta beraiek baino hiru puntu gutxiago dituen Anaitasunaren aurka ariko dira larunbatean 15:30ean Azkoitian. Infantil neskek 1 eta 3 irabazi zuten Goierri Gorriren aurka. Bigarren daude liderrarekin berdinduta eta hirugarren dagoen Tolosaren zelaian jokatuko dute larunbatean 9:00etan. Azkenik, jubenil mutilek sailkapeneko lider jarraitzen dute Ostadarri 0 eta 6 irabazi ostean eta asteburuan atsedena izango dute.