Intxurreko futbolarien bi partida jokatuko dira larunbatean Elorri zelaian. Erregional mutilak kopa jokatzen hasiko dira eta lehen partida etxean jokatuko dute larunbatean 15:30ean Texas Lasartearraren aurka. Etxean ariko den beste taldea infantil mutilena izango da. Larunbatean 11:30ean Aizkorri Goierriren aurkakoa izango dute. Iragan astean 0 eta 14 irabazi zuten Ostadarren zelaian eta bigarren postuan iritsiko dira liderraren aurkako partidara.

Bestelakoan, jubenil mutilak igoera fasea jokatzen hasiko dira Arrupe Chaminaderen zelaian larunbatean 15:50ean. Ohorezko mailako kadete mutilek Eibarren jokatuko dute igandean 15:30ean. Oriokoren aurka bigarren itzuliko lehen partida jokatu zuten iragan astean eta hutsean berdindu zuten. Azkenik, infantil neskek Andoainen jokatuko dute larunbatean 11:00etan Euskaldunaren aurka. Azken partidan 1 eta 7 galdu zuten Tolosaren aurka eta aho zapore txarra kentzen saiatuko dira.