Intxurreko futbolarien bi neurketa jokatuko dira Elorri zelaian larunbatean. Gorengo mailako jubenilek sailkapeneko goiko postuetan jarraitzea izango dute helburu larunbatean 18:30ean Billabonaren aurka. Anaitasunari 0 eta 3 irabazi zioten eta bigarrenak dira. Infantil mutilek Mondragon liderraren aurka jokatuko dute 11:30ean. Iragan asteburuan launa berdindu zuten Lazkaon eta laugarrenak dira.

Etxetik kanpo ariko direnen inguruan, erregionalek sailkapeneko beheko postuetatik ihes egitea izango dute helburu Texasen zelaian larunbatean 17:30ean jokatuko duten partidan. Tolosaren aurka 4 eta 2 galdu ostean zortzigarrenak dira puntu bakarrarekin. Lehen mailako jubenilek lidertza sendotu nahiko dute egun berean 18:00etan Billabonan. Ostadarri 3 eta 0 irabazita lehen postuan jarraitzen dute. Ohorezko mailako kadeteek Zumaian jokatuko dute igandean 12:30ean, Tolosaren aurka 0 eta 8 galdu ostean. Alegiarrak eta zumaiarrak berdinduta daude sailkapenean eta puntuak batzeko aukera ona izan daiteke. Azkenik, infantil mailako neskek bana berdindu zuten Goierri Gorriren aurka eta larunbatean 12:00etan beraien atzetik dagoen Urolaren zelaian jokatuko dute.