Larunbatean Intxurreko futbol taldeen hiru partida jokatuko dira Elorri zelaian. Erregional mutilek Ostadarren aurkakoa izango dute larunbatean 15:30ean. Alegiarrek 0 eta 1 irabazi zuten Texasen zelaian eta seigarren postuan daude lau punturekin. Lehen mailako jubenilek 2 eta 3 irabazi zuten Billabonan eta lidertzan jarraitzen dute jokaturiko guztia irabazita. Bolada onari jarraipena ematen ahaleginduko dira egun berean 18:00etan seigarren dagoen Danenaren aurka. Etxean ariko den hirugarren taldea kadeteen ohorezko mailakoa izango da. Zumaian 3 eta 0 galdu zuten eta larunbatean 11:00etan Danena liderraren bisita izango dute.

Etxetik kanpo ariko direnen inguruan, gorengo mailako jubenilek Beasainen jokatuko dute larunbatean 16:00etan. Billabonaren aurka bosna berdindu zuten eta laugarren postuan daude. Infantiletan, mutilek Ordizian jokatuko dute larunbatean 9:30ean. Bigarrenak dira Mondragoni 5 eta 1 irabazi ostean. Neskek 1 eta 5 irabazi zuten Urolaren zelaian eta hirugarren postuan daude, egun berean 13:15ean Goierri Gorriren zelaian jokatu aurretik.