Intxurreko futbolariek lau partida jokatuko dituzte etxean jaiegun bat gehiago duen asteburuan. Erregionalek Beasainen aurkakoa izango dute larunbatean 16:00etan. Usurbilen 0 eta 4 irabazita hirugarren postuan daude. Gorengo mailako kadete mutilek Mutriku izango dute aurkari ostiralean 10:00etan. Hauek ere garaipena lortu zuten Soraluzen azken partidan eta zortzigarren daude. Lehen mailako kadete neskek atsedena izan zuten iragan asteburuan eta Mondragonen aurka jokatuko dute larunbatean 11:00etan. Infantil mutilen talde batek ere ez zuen partidarik izan aurreko jardunaldian eta Oriokoren aurka ostiralean 13:30ean jokatuz itzuliko dira lehiara.

Etxetik kanpo ariko direnen inguruan, ohorezko mailako jubenilek Trintxerpen jokatuko dute igandean 15:30ean. Euskaldunaren aurka bina berdindu zuten eta seigarrenak dira. Infantil mutilen bigarren taldea Ordizian ariko da larunbatean 9:00etan. Beasaini irabazita beste garaipen bat lotu nahiko dute. Azkenik, maila bereko neskek bina berdindu zuten Goierri Gorriren aurka eta ostiralean 10:00etan Seguran jokatuko dute.