Intxurreko futbol taldeek jardunaldi berri bateko partidak jokatu zituzten iragan asteburuan. Guztira bost izan ziren lehiatu ziren Intxurreko taldeak eta horietatik bik lortu zuten garaipena. Kadete mailako neskek 6 eta 0 irabazi zuten Danenaren kontra. Denboraldiko bigarren garaipena lortu dute eta sailkapeneko laugarrenak dira zazpi punturekin. Asteburuko neurketa Hernaniren zelaian jokatuko dute larunbatean 9:00etan. Hernaniarrak bosgarren daude hiru punturekin. Garaipena lortu zuen beste taldea jubenilen lehen mailakoa izan zen. Kasu horretan ere Danena izan zuten aurkari eta 4 eta 0 irabazi zuten. Bederatzi puntu dituzte eta puntu kopuru berarekin dagoen Idiazabali egingo diote bisita, larunnatean 18:00etan.

Kadete mailara itzuliz, mutilek bina berdindu zuten Ordizian. Bosgarren postuan daude zortzi punturekin eta beraien aurretik dagoen Beasainen aurka jokatuko dute larunbatean 11:00etan etxean. Porrotei dagokienean, gorengo mailakoek 4 eta 0 galdu zuten Aretxabaletan. Sailkapeneko goiko postuetan dira atxabaltarrak eta alegiarrek ezer gutxi egin ahal izan zuten. Hamaseigarrenak dira lau punturekin eta laugarren dagoen Zumaiakoren bisita izango dute larunbatean 16:00etan. Bestetik, Aralar Intxurreko infantilek 0 eta 2 galdu zuten Aizkorri Goierriren aurka. Hiru puntu dituzte eta laugarren postuan daude, larunbatean 12:00etan puntu kopuru berarekin dagoen Ordiziaren zelaian jokatu aurretik.