Larunbatean futbolaz gozatzeko aukera berri bat izango da Elorri futbol zelaian. Partida bakarra jokatuko dute etxean herriko taldeek eta hori jubenilen lehen mailakoa izango da. 10:00etatik aurrera Intxurre eta Tolosa neurtuko dira. Alegiarrak bosgarren postuan daude iragan astean Ordizian 0 eta 3 irabazi ostean eta emaitza bolada onari jarraipena ematen ahaleginduko dira. Aurrean ordea, sailkapeneko bigarren postuan dagoen taldea izango dute. Gorengoen mailakoak bigarren garaipena lortzen ahaleginduko dira. Aurreko jardunaldian Beasainen aurka 7 eta 2 irabazita sasoiko lehen garaipena lortu zuten eta larunbatean 18:00etan Idiazabalen beste hiru puntu batzen saiatuko dira sailkapeneko beheko postuetatik ateratzen saiatzeko.

Kadete mailan, mutilek 7 eta 0 galdu zuten Urolaren aurka. Bosgarren postuan daude eta Tolosa liderraren zelaian jokatuko dute larunbatean 11:45ean. Neskek aldiz, atsedena izan zuten azken jardunaldian eta hezur gogorra izango dute aurrean asteburu honetan. Euskalduna liderraren zelaian jokatuko dute larunbatean 12:15ean. Azkenik, infantilek garaipenarekin agurtu dute lehen ligaxka. Beasaini 3 eta 1 irabazita bosgarren amaitu dute sei punturekin.