Alegiako Udaleko Kultura batzordeak antolatuta, irailaren 25ean, igandea, egingo da Alegiako Artisau eta Nekazal Azoka Bereziaren hamargarren ekitaldia. Goizeko 11:00etatik 14:00etara Alegiako plazan eta inguruan jarriko diren postu ezberdinak ikusteko aukera izango dute bertaratzen direnek eta nola ez, postu horietan eskaintzen diren artisau edo nekazal produktuak erostekoa ere bai.

Hamargarren edizioa izango du aurtengoa Azoka Bereziak. Urtetik urtera hazten joan den ekitaldia izan da eta nahiz eta  postuen gehiengoa Alegiako nekazari eta artisauenak izan, kanpotik etortzen diren ekoizleek are eta gehiago janzten dute azoka.

Aurtengoari begira, azokan postua jarri nahi dutenek zabalik dute jada izena emateko epea. Irailaren 19a, astelehena, izango da horretarako azken eguna eta interesa dutenek kultur etxean eman beharko dute izena. Horretarako, bertatik pasatzeko aukera dute 10:00etatik 13:00era edo 19:00etatik 21:00etarako ordutegian, edota teléfonoz eman dezakete izena 943 65 46 98 zenbakira deituta.

Egunari begira jarrita, eguraldi txarra egiten badu Elorri pilotalekuan egingo da azoka. Bestalde, postuetan erosketak egiten dituztenei txartel batzuk banatuko zaizkie eguerdiko 13:00ean egingo den zozketa batean parte hartu ahal izateko. Zozketa horretan, azoka postu guztietako produktuak biltzen dituen sorta bat zozketatuko da.