Alegiako irakurle taldeak Itsaso Martinen ‘Puntobobo’ eleberria aztertuko du ekainaren 19an 18:00etatik aurrera liburutegian. Nora Urbizu Arozenak gidatuko du saioa eta ohiko moduan, irakurle taldeko ateak edonorentzat zabalik daudela gogorarazi nahi da. Ez dago liburua irakurri beharrik saioan parte hartzeko.

Ez da normala izango, esan zion medikuak haurrak urtebete zuenean. Jaio aurretik, ordea, Amak jakin bazekien barruan zeraman haurra ez zela besteak bezalakoa izango. Amak alaba etxean isolatu zuen, eta herritarren txutxu-mutxuak areagotu egin ziren. Hain zen estua bien arteko harremana, beste alaba baten jaiotzak ez baitzuen hori haustea lortu. Etxe heze eta ilunean sustraituko dira hiru emakumeak, asinkronia batean; bizilagunen usteak inguratuta, sufrikario eta errezoen artean, patu ankerrari begira. Etxe horretan ez dira, inolaz ere, hain erraz ustelduko sekretuak. Emakumeen sufrimendua, osasun mentala eta familiarteko dinamikak ardatz ditu Puntobobo eleberriak. Itxaso Martinek ez du eufemismorik erabiltzen; estilo intimista eta soil batez idatzi du istorio honen errealitate gordina. Ez da eleberri kostunbrista bat, protagonisten psikologian sakonduz idazleak ateratako argazki gardena baizik.

Saioak irauten duen bitartean, liburutegia itxita egongo da.