Arrakastatsua izan zen Alegiako Artisau eta Nekazal Azokaren hamabosgarren ekitaldia. Goizeko 11:00etan ateak zabaldu zirenetik etengabea izan zen bisitarien joan-etorria Elorri pilotalekuan. Sarreran zegoen taloen postuaren tentazioa gainditu eta pilotaleku barruan zeuden 19 erakustokietako produktuak ikusten eta kasu askotan, erosten ibili ziren herritarrak. Bertako eta ingurutik etorritako ekoizleek lan dezente egin behar izan zuten bezero guztiak artatzen eta hori zalantzarik gabe, seinale ona da.