Intxurreko futbolariek jardunaldi eskasa izan zuten iragan asteburukoa. Sei partida jokatu eta garaipen bakarra erdietsi zuten, kadete mutilek lorturikoa. Lazkaon 0 eta 1 irabazi zuten eta lidertzan sendo jarraitzen dute jokaturiko partida guztiak irabazita. Larunbatean 11:45ean bigarren dagoen Idiazabalen bisita izango dute. Larunbatean 15:30ean erregional mutilek ere etxean jokatuko dute. Ostadar liderra izango dute aurkari eta alegiarrak Lazkaon 5 eta1 galduta iritsiko dira partida horretara, sailkapeneko seigarren postuan. Etxean ariko den hirugarren taldea gorengo mailako neskena izango da. Zestoaren aurka 2 eta 4 galdu zuten azken partida eta larunbatean 9:30ean Mutrikuren aurkakoa izango dute.

Jubenil mutilek 3 eta 2 galduz zuten Billabonan. Hirugarren postuan daude eta larunbatean 16:30ean Lazkao liderraren zelaian jokatuko dute. Infantilei dagokienean, bi taldeak galtzaile suertatu ziren. Mutilek 1 eta 2 galdu zuten Lazkaoren aurka. Seigarrenak dira eta larunbatean 12:15ean bigarren dagoen Tolosari egingo diote bisita. Neskek berriz, 1 eta 6 galdu zuten Tolosaren aurkako partida. Hauek ere seigarren postuan daude eta laugarren dagoen Goierri Gorriren zelaian ariko dira larunbatean 10:00etan.