Alegiako Kultura batzordeak lau ekitaldiz osaturiko egitaraua prestatu du abendurako. Abendu Kulturala bezala izendatu den zikloan, bakarrizketa bat, kabaret bat, irakurle taldearen saio bat eta ipuin kontaketa bat izango dira. Ekitaldi guztietan indarrean dauden segurtasun neurriak beteko dira eta une oro antolakuntzaren oharrei kasu egiteko eskatzen da.

Lehen ekitaldia abenduaren 4an izango da. Zuhaitz Gurrutxagak ‘FutbolisTOK’ bakarrizketa eskainiko du zinean 19:00etatik aurrera. Ateak 18:30ean irekiko dira sarrera segurtasun neurri guztiekin egin ahal izateko eta bertaratzeko asmoa dutenei garaiz joateko eskatzen zaie. Zinearen edukiera mugatua izango da eta bakarrizketara joan nahi dutenek azaroaren 30etik aurrera erosi ahal izango dituzte sarrerak kultur etxean, 18:30etik 20:00etarako ordutegian, 8 euroko prezioan.

Abenduaren 10ean, osteguna, Ixabel Agirresaroberen ipuin kontaketa izango da kultur etxeko areto nagusian 17:00etan. 4 eta 7 urte bitarteko haurrei zuzendua izango da eta bertaratu nahi dutenek 16:45erako kultur etxean egon beharko dute, segurtasun neurri guztiak betetzeko.

Abenduaren 17an, Alegiako irakurle taldeak bigarren saioa egingo du. Amets Arzallus eta Ibrahima Balderen ‘Miñan’ liburua landuko dute 18:00etatik aurrera kultur etxean, Amaia Goikoetxeak gidatuko duen saioan.

Azkenik, abenduaren 18an, ostirala, Andoni Mutiloaren ‘Esnatu naiz’ kabareta ikusi ahal izango da zinean 19:00etan. Emanaldi horretarako sarrerak kultur etxean salduko dira abenduaren 14tik aurrera, 18:30etik 20:00etarako ordutegian, 4 euroko prezioan. Kasu honetan ere, ateak 18:30ean zabalduko dira sarrera mailakatua egiteko.

Ekitadi guztietan indarrean dagoen legediak ezarritako segurtasun, higiene eta edukiera neurri guztiak beteko dira. Horrenbestean, Udaletik herritarrak ekitaldietara joatera animatu nahi dira, kultura segurua delako. Egitarau osoa Alegiako Udaleko agenda atalean kontsultatu daiteke.