Osakidetzak tailer ezberdinak egingo ditu urrian hasita ‘Paziente bizia’ ekimenaren baitan. Alde batetik, ‘Nire ongizate emozionala zainduz’ tailerra eskainiko da. Urriaren 8an hasiko da eta azaroaren 26an amaitu. Astero 2 ordu eta erdiko saio bat izango da bi monitorek gidatuta eta norbere emozioak ezagutzen eta kudeatzen erakutsiko zaie parte hartzaileei. Pertsona guztientzat irekia izango da.

Bestetik, ‘Nire bihotz-gutxiegitasuna zaintzen’ tailerra eskainiko da urriaren 3tik azaroaren 14ra bitartean. Astero saio bat izango da 10:30etik 12:30era. Bihotz-gutxiegitasunarekin loturiko gaixotasunak dituzten pertsonei eta beraien zaintzaileei zuzenduta dago.

Bi tailerretako saioak Tolosako kultur etxean izango dira. Interesatuek Alegiako osasun zentroan edo pacienteactivo@osakidetza.eus helbidera idatzita eman dezakete izena.