Beste ostiral batez pilota partidak ikusteko aukera izango da Elorri pilotalekuan. Intxurreko pilotariak izango dira protagonistak 19:00etan hasiko den jaialdian eta guztira lau partida jokatuko dira. Lehena alebin mailakoa izango da eta Intxurre eta Hernani neurtuko dira. Ondorengo bietan infantil mailako pilotariak ariko dira eta Oiarpe eta Aretxabaletako bikoteak izango dira Intxurrekoen aurkariak. Azkenik, Udaberri txapelketako neurketa bat jokatuko da nagusien bigarren mailan Intxurreko eta Zumaiako pilotarien artean.

Aurreko jardunaldiko emaitzei begiratu bat emanda, Intxurrek jokatu zituen zazpi partidak irabaztea lortu zuen. Kadeteen bigarren mailan, jubenilen lehenengoan eta nagusien hiru mailetan lortu zituzten garaipena Intxurrekoek asteburu oparo batean.  Bestetik, kluben arteko Euskal Herriko txapelketan ere badu ordezkaritza Intxurrek. Eskuz banaka, nagusietan, Gaztelekuren aurka garaipena lortu zuen 22 eta 19 eta multzoko bigarren postuan dago. Gomazko paletan, kadeteetan, 30 eta 8 galdu zuen Intxurrek Mallabiaren aurka. Bosgarren postuan daude asteburuan Gure Pilotaren aurka jokatu aurretik.