Intxurreko pilotariek Gipuzkoako Ezker Horma txapelketako hirugarren jardunaldiko partidak jokatuko dituzte asteburuan. Horietako batzuk bertatik bertara ikusteko aukera izango da gainera Alegian. Intxurre pilota taldekoek ohikoa duten moduan, ostiralean 19:00etan eskuzko pilota partidak izango dira Elorri pilotakuan. Gipuzkoako Ezker Horma txapelketako lehen ligaxkako partidak izango dira. Kadeteen eta jubenilen lehen mailako neurketak izango dira, gizonezkoenak. Kadeteetan Intxurrek Azkoitia izango du aurkari eta jubeniletan Añorgako bikotea izango da Intxurrekoen kontrarioa. Beste bikoteak Oñatin, Zumarragan, Errenterian eta Hernanin ariko dira.

Iragan asteburuan jokaturiko partidetan, Intxurreko sei bikotek lortu zuten garaipena. Kadeteen lehen mailako bikoteak galdu egin zuen eta hirugarren mailakoak irabazi. Jubebiletan, lehen mailan garaipen bat eta porrot izan zituzten eta nagusietan, azkenik, lehen mailakoek irabazi egin zuten eta hirugarren mailan, bi garaipen eta porrot bat bildu zituzten. Gomazko paletan ari diren nagusien mailako neskek, galdu egin zuten.