Sutarri dantza taldeak 2016-2017 ikasturteko azken emanaldia eskainiko du ostiralean Elorri pilotalekuan. Gaueko 22:00etan emango zaio hasiera ikuskizunari eta guztira, sei urtetik gorako ia ehun dantzari ariko dira oholtzan. Bederatzi taldetan banatuta ariko dira eta euskal dantza tradizionalak eta koreografia ezberdinak eskainiko dituzte. Dantzariekin batera, Txintxarri abesbatzako hainbat kide ere izango dira emanaldian. Guztira, 75 minutu inguruko iraupena izatea aurreikusten da eta sarrera doakoa izango da. Dantza taldeko arduradunek eskerrak eman nahi izan dizkie Txintxarri abesbatzari emanaldian lagun izango dituztelako eta horrekin batera, Eneritz Ugartemendiak eta Ixone Urkirik urte guztian egindako lana goraipatu nahi izan dute.