Berriak
Atzealdea

Txintxarri Abesbatza Kultur Elkarteak Gabon Kantu Eske Herrikoia antolatu du abenduaren 24rako

Herritarrak bertan parte hartzera animatu nahi dira eta abenduaren 15ean eta 22an bi entsegu egingo dira kultur etxean

2022·12·05


Txintxarri abesbatza kultur elkarteak Gabon Kantu Eske Herrikoia antolatu du abenduaren 24rako. Abesbatza urtero ibiltzen da egun horretan arratsaldez herriko kaleetan kantuan eta nahiz eta iragan uztailean bere jarduna eten, ohiturei eusteko erabakia hartu dute eta herriko haur, gazte eta helduak beraiekin abestera gonbidatu nahi dituzte.

Herriko musikariek ere hartuko dute parte kantu eske horretan eta kutsu herrikoia eman nahi zaio. Bada, kantu eske horretan parte hartu nahi duten herritarrei abenduaren 15ean eta 22an 20:00etan kultur etxean egingo diren entseguetara agertzeko gonbitea luzatzen zaie. Parte hartze zabala izango duen ekitaldi ireki bat antolatzea da abesbatzaren helburua eta hori dela eta, lotsak albo batera utzi eta herritarrei bertan parte hartzeko gonbitea luzatzen zaie.

Kantu eske horretan ateratzen den dirua Mukwano Lagun Gobernuz Kanpoko Erakundearentzat izango da.