Alegiako Kultura batzordeak prest du Udazkeneko Kultur Egitaraua. Urriaren 15ean hasi eta abenduaren 12ra bitartean askotariko hamabost ekitaldi eskainiko dira, adin guztietako herritarrentzat zuzenduta. Urriaren 15ean, asteartea, hitzaldi batekin hasiko da egitaraua. Aralarpean guraso elkarteak antolatuta, “Autokontzeptu eta autoestimaren indartzea” hitzaldia eskainiko da 18:30etik aurrera kultur etxean. Hitzaldi honek bigarren saio bat izango du urriaren 29an. Urriaren 17an, osteguna, ipuin kontaketa bat izango da. Kasu honetan gainera, emanaldi berezia izango da, Amelie ipuin kontaketa musikatua eskainiko delako 17:00etatik aurrera liburutegian.

Urriaren 19an, larunbata, Txintxarri Eguna ospatuko da. Ohi bezala, Txintxarri Txiki eta Txintxarri abesbatzek kontzertua eskainiko dute 19:45etik aurrera elizan eta aurtengoan, Uztaritzeko Lapurtarrak abesbatza izango dute talde gonbidatu modura. Hilaren 20an, igandea, mendi asanbladak antolatuta Murumendira mendi irteera bat egingo da. Urriko ekitaldiak amaitzeko, hilaren 25ean, ostirala, Margolaria pelikula eskainiko da Elizpe zinean 22:00etan eta ondoren solasaldi musikatua izango da Mikel Urdangarin eta Oier Aranzabalekin.

Azaroan bost ekitaldi izango dira. 13an, asteazkena, Gipuzkoako Foru Aldundiko Gipuzkoa Argitu sailak “Eskuratu zure argindar kontsumoaren datuak eta murriztu zure kontsumoa!” tailerra eskainiko du 18:00etan kultur etxean. Hurrengo egunean, azaroak 14, Maite Francoren ipuin kontaketa saioa izango da liburutegian 17:00etatik aurrera. Azaroaren 22an, ostirala, Xexili Eguna ospatuko da. Loatzo musika eskolako musikarien eskutik festa izango da herriko kaleetan zehar 18:00etatik aurrera. Azkenik, azaroaren 25ean, astelehena, Emakumeenganako Indarkeriaren Aurkako Nazioarteko Eguna ospatzen da.

Egitaraua amaitzeko, abenduan lau hitzordu izango dira. Hileko lehen egunean mendi asanbladak Bedaioko buelta egingo du. Abenduaren 3an, asteartea, Euskararen Eguna izango da. Hurrengo egunean, hilak 4, Galtzaundi taldearen eskutik “Euskaraz bizi ahal gara!” hitzaldia entzun ahal izango da 19:00etan eta egitaraua ixteko, abenduaren 12an, osteguna, Maider Galarzaren ipuin kontaketa izango da 17:00etan liburutegian.

Egitarau osoa webgune honetako agenda atalean aurkitu dezakezue, lotura honetan.