Inaxio Begiristain Kirol eta Kultur Etxeko bazkide direnek, 2020ko urtarrilean izango dute bazkide txartelak berritzeko aukera. Berritze kanpaina horretan, hainbat baldintza betetzen direla ziurtatuko da lehenik. 

Horrela, bazkide guztien kasuan, Udalak Alegian erroldatuta daudela ziurtatuko du. Horrekin batera, langabezian dauden bazkideek, Lanbideko ziurtagiri eguneratua aurkeztu beharko dute.

Ikasleen kasuan, dagokien ikastetxean eskatu behar dute zentro horretan ikasten ari direla baieztatzen duen ziurtagiria. 

Adin txikikoen kasuan berriz, bere NANaren fotokopia eta kontu korronteko titularraren NANaren fotokopia ere aurkeztu beharko dute. 65 urtetik gorakoek NANaren fotokopia aurkeztu beharko dute, hobariaz baliatu ahal izateko.

Kontu korronte zenbakia emanda duten bazkideen kasuan, lehenengo kuota urtarrilaren 15aren eta 18aren artean kargatuko zaie, helbideratuta duten kontu zenbakian.

Bazkidetza urte osorako izango da eta prezio publikoen ordenantza arautzailean jasotako tarifa aplikatuko da. Bigarren kuota, urtean zehar kobratuko da. 

Kuota helbideratu gabe eta bazkide izaten jarraitu nahi dutenen kasuan, 2020ko urtarrilaren 20a baino lehen Kutxabankeko 2095 5020 03 1061513718 kontu korronte zenbakian egin behar dute dagokien kuotaren ordainketa eta ziurtagiria kultur etxean aurkeztu.

2019an bazkide izan eta baja eman nahi dutenek 2020ko urtarrilaren 10a baino lehen kultur etxera joan eta hori jakinarazi behar dute, txartela entregatuz.

Aldi berean, bazkide egin nahi dutenek edo gaiaren inguruko argibide gehiago nahi duen orok, kultur etxera jo dezake edo 943 65 46 98 telefono zenbakira deitu. Gogoan izan, kultur etxea 10:00etatik 13:00era eta 15:00etatik 21:00etara egoten dela zabalik, astelehenetik ostiralera.​