Alegiako Mendi Asanbladak urtero antolatzen du asteburu pasako irteera bat uztailaren hasieran. Bada, aurtengoan uztaileko lehen asteburuan egingo dute eta Baztan aldera joango dira. Bertiz eta Amaiur inguruak ezagutuko dituzte eta 1418 metroko altueran dagoen Saioa mendira ere igoko dira. Uztailaren 1ean, larunbata, goizeko 10:00etan abiatuko dira kotxeetan Alegiatik eta itzulera igande arratsaldean izango da. Larunbateko gaua Elizondoko Kortarixar ostatuan emango dute.

Helduek 28 euro ordaindu beharko dute eta haurrek 25. Prezio horretan ostatua, afaria eta gosaria sartzen dira. Izena emateko epea zabalik dago eta bi modutara eman daiteke. Kultur etxean edo posta elektronikoz, alegiakomendiasanblada@gmail.com helbidera idatzita. Epea ekainaren 12an, astelehena, amaituko da baina plaza mugatuak direnez, interesa dutenei ahalik eta azkarren izena ematea gomendatzen zaie.