Txintxarri Abesbatza Kultur Elkarteak antolatuta, azaroaren 30ean, larunbata, Ion Garaialde alegiarrak kantu errezitaldi bat eskainiko du Alegiako elizan. 20:00etan hasiko da emanaldia eta Garaialdek Juanjo Orbegozo alegiarra izango du bidelagun organoan eta Esther Iñiguez irundarra pianoan.

Betidanik izan du kanturako zaletasuna Garaialdek. Txintxarri abesbatzako kide izan zen Joxe Gastesiren zuzendaritzapean. Madrilera bizitzera joan zen eta antzerkian ibili da lanean. Azken urteetan, Segoviako abesbatza bateko kide izan da eta kantu ikasketak ere ondu ditu.

Txintxarri Abesbatza Kultur Elkarteak eta Udalak alegiarrak zein inguruko herrietakoak emanaldi horretaz gozatzera animatu nahi dituzte.